Сумдад бэлчээр хариуцсан мэргэжилтнүүд дутагдалтай байна

Увс, Ховд, Баян-Өлгий аймгуудад хэрэгжиж буй “Аймаг, сумын бүсчилсэн ногоон хөгжлийн хөрөнгө оруулалтын хөтөлбөр”-ийн хүрээнд бэлчээрийн асуудал хариуцсан мэргэжилтэн П.Наранбаатар орон нутагт ажиллаж, 16 сумын бодит нөхцөл байдалтай газар дээр нь танилцлаа.

Томилолтын үеэр аймгийн болон сумын түвшний төр захиргааны байгууллагуудын газар зохион байгуулалтын талаарх бодлого төлөвлөлт, бэлчээрийн менежментийн төлөвлөгөө, хүний нөөцийн хүрэлцээ, мэргэжилтнүүдийн чадавх, тоног төхөөрөмжийн хангамжийн талаар оролцогч талуудтай уулзалт, сургалт зохион байгуулжээ.

Гол тулгамдсан асуудлууд:

• Сумдад газрын даамал, бэлчээр, газар тариалан хариуцсан мэргэжилтнүүд дутмаг.
• Мэргэжилтнүүдийн ажиллах нөхцөл тааруу, тогтвор суурьшил муу.
• Фотомониторингийн багаж, судалгааны хэрэгсэлхомс, шинэчлэх шаардлагатай.
• Бэлчээрийн ашиглалт, хамгаалалтын асуудал сумдын газар зохион байгуулалтын төлөвлөгөөнд бүрэн тусгадаггүй, энэ талаар мэдээ тайлан хангалттай гардаггүй.

Төслийн хүрээнд аймгуудын Газрын харилцаа, барилга, хот байгуулалтын газар, Хүнс, хөдөө аж ахуйн газар, мөн Бэлчээр ашиглагчдын холбоо, сумын газрын даамал, бэлчээр, газар тариалан хариуцсан мэргэжилтнүүдтэй хамтран ажиллах арга хэмжээний чиглэл гарган ажилласан байна.

 Оролцогч талууд дараах саналуудыг гаргасан

• Сумдад бэлчээр ашиглах, хамгаалах журмыг боловсруулах, батлах, мөрдүүлэхтогтолцоог бий болгох.
• Орон нутагт мэргэжилтнүүдийгсуурьших нөхцөлийг бүрдүүлэх, чадавхжуулах сургалтад хамруулах.
• Бэлчээрийн газрын судалгаа, төлөвлөлт, тайлан боловсруулахажлыг хамтын зохион байгуулалтаар гүйцэтгэн хэрэгжүүлэх.

Эдгээр асуудлыг шийдвэрлэхэд төсөл, орон нутгийн захиргаа, мэргэжлийн байгууллагуудын хамтын ажиллагаа, хүний нөөцийн талаар тогтвортой бодлого чухал байгааг оролцогчид онцолж байна.

Цаашид бэлчээрийн менежментийн чиглэлээр дараах ажлуудыг хэрэгжүүлнэ. Үүнд:

• Малын тоо толгой, сүргийн бүтцийг бэлчээрийн даацад тохируулан, бэлчээрийн менежментийн төлөвлөгөөний дагуу хуваарьтай ашиглах замаар бэлчээрийн доройтлыг бууруулах, эдийн засгийн эргэлтэд оруулах;
• Бэлчээрийн даац хэтрэлтийг багасгаж, малчдын байгалийн эрсдэлийг даван туулах чадамжийг нэмэгдүүлэх замаар нэг малаас авах ашиг шимийг нэмэгдүүлэн малчдын амьжиргааг сайжруулах;
• Орон нутаг дахь бэлчээр хариуцсан боловсон хүчнийг чадавхжуулах;
• Аймаг сумын бэлчээрийн талаар баримтлах баримт бичгийг боловсруулах, хэрэгжүүлэх ажлуудад дэмжлэг үзүүлнэ.