Хамгаалагдсан аж ахуй байгуулна
Мал аж ахуй, бэлчээрийн менежментийн бүрэлдэхүүн хэсгийн хүрээнд Малын эрүүл мэнд, үржлийн чиглэлээр мал аж ахуй, агро бизнесийн мэргэжилтэн М.Галбадрах Баян-Өлгий, Увс, Ховд аймгийн мал эмнэлгийн лабораторийн үйл ажиллагаатай танилцаж, холбогдох мэргэжилтнүүдтэй уулзаж өнөөгийн нөхцөл байдал, тулгараад байгаа хүндрэл бэрхшээлийн талаар ярилцаж, санал солилцсоны эцэст лабораторийн тоног, төхөөрөмжөөр хангах, лабораторийн боловсон хүчнийг бэлтгэх, давтан сургах бэхжүүлэхэд төслийн зүгээс дэмжлэг үзүүлэх чиглэлд цаашид хамтран ажиллахаар болсон байна. Түүнчлэн Ховд аймгийн Дарви, Булган, Дуут, Эрдэнэбүрэн, Ховд Баян-Өлгий аймгийн Толбо, Дэлүүн, Буянт, Алтай, Булган, Өлгий, Увс аймгийн Ховд, Өмнөговь, Тариалан, Сагил, Тариалан, Улаангом зэрэг 16 сумдын тамгын газар, Мал эмнэлгийн газар, Хөдөө аж ахуйн газрын болон сумдын мал эмнэлгийн тасгийн ажилтан, малчдын төлөөллүүд давхардсан тоогоор 150 гаруй хүнд танилцуулга, ярилцлага, сургалт зохион байгуулан мэдээ, мэдээллээр ханган ажиллаад ирлээ.
Малын гаралтай бүтээгдэхүүний гарал үүслийг тодорхойлж буй Мал эмнэлгийн нэгдсэн систем, МАХИС системийн үйл ажиллагаатай танилцаж уг системийн давуу болон сул талуудыг хэрхэн засаж сайжруулах боломжийн талаар санал солилцож улмаар системийг сайжруулах, хөгжүүлэлтийг хэрхэн хийх тухай хүсэлтийг албажуулан АСДИП төсөлд хүргүүлэхээр болов.
Томилолтоор ажилласан гурван аймаг, 13 сумдын Мал эмнэлгийн газар, Мал үржлийн тасгуудын мэргэжилтнүүдтэй малын ашиг шимийг сайжруулах зорилгоор үржлийн ажлын стратеги төлөвлөгөө батлуулах, малдаа үзлэг ангилалт хийж үржилд тэнцэхгүй эцэг малыг заазлах, үржилд тэнцэх хээлтүүлэгч малыг ялган төвлөрүүлэх, үржлийн ажилд стандартын шаардлага хангасан цөм сүргийн хээлтүүлэгч ашиглах чиглэлд төслийн зүгээс бодитой дэмжлэг үзүүлэх боломжийн талаар 30 гаруй уулзалт зохион байгуулж мэдээлэл өгчээ.
Увс Ховд, Баян-Өлгий гурван аймгийн төв Баян-Өлгий аймгийн Дэлүүн сум, Увс аймгийн Өмнөговь суманд байгуулагдах Хамгаалагдсан аж ахуй (агропарк)-д олгогдсон газар нь нефтийн агуулахын ойролцоо, хогийн цэгийн дор, гэр хорооллын дунд байршилд сонгогдсон байсныг холбогдох аймгийн Газрын алба, Хөдөө аж ахуйн газар, Мал эмнэлгийн удирдлагын хамт газар дээр нь танилцаж хүн малын хөлөөс зайдуу эрүүл соргог газар, тэжээлийн баазтай аль болох ойр газрыг сонгож Иргэдийн төлөөлөгчдийн хурлаар шийдвэрлүүлэхээр боллоо.
Аймаг, сумын бүсчилсэн ногоон хөгжлийн хөрөнгө оруулалтын хөтөлбөр төсөл нь мал аж ахуйн боловсон хүчнийг чадавхжуулах, олон нийтэд суурилсан малын эрүүл мэндийн ажилтан (мал эмнэл зүйн, малын үржлийн ажилтан, техникч) бэлтгэх, давтан сургах, нарийн мэргэшүүлэх сургалтын тогтолцоог боловсруулах чиглэлд баруун бүсийн хөгжлийн төв “Ховд аймгийн Хөгжил коллеж”-той хамтран баруун гурван аймгийн боловсон хүчнийг төвлөрүүлэн сургах боломж байгааг онцоллоо.
