Уур амьсгалын өөрчлөлтийг сааруулах, дасан зохицох төсөл, хөтөлбөрүүдийн төлөөллүүд уулзлаа
Байгаль орчин, уур амьсгалын өөрчлөлтийн яам, Даян Дэлхийн Ногоон Хөгжлийн Институт, ҮТХН-ийн түншлэлээс уур амьсгалын өөрчлөлтийг сааруулах, дасан зохицох чиглэлээр үйл ажиллагаа явуулж буй төсөл хөтөлбөрүүдийн төлөөллүүдтэй уулзалт зохион байгууллаа. Уг уулзалтад ECCO-FARM төсөл, АДАПТ төсөл, ASDIP, СКАЛА төсөл, DRYLAND төсөл, ENSURE төсөл, STREAM төсөл, CBIT-2 төсөл, CANSAP төсөл (ADRA), UNICEF, JICA, TNC, PIN, Дэлхийн Банк, Азийн Хөгжлийн Банк, зэрэг төсөл хөтөлбөр, олон улсын байгууллагуудын төлөөллүүд оролцож асуудлаа хэлэлцлээ. Аймаг сумын бүсчилсэн ногоон хөгжлийн хөрөнгө оруулалтын хөтөлбөр /ASDIP/ төслийг төлөөлж Мал аж ахуй бэлчээрийн менежментийн бүрэлдэхүүн хэсгийн дэд зохицуулагч Б.Ванчиндорж, Менежментийн асуудал хариуцсан дэд зохицуулагч Г.Сүглэгмаа, Байгаль орчин, уур амьсгалын өөрчлөлтийн асуудал хариуцсан мэргэжилтэн Б.Цэрэндулам нар оролцлоо.
Уулзалтын гол зорилго нь уур амьсгалын өөрчлөлт, цөлжилт, газрын доройтлыг сааруулах чиглэлээр тулгамдаж буй асуудлыг хэлэлцэж, энэ чиглэлээр хэрэгжиж буй төсөл хөтөлбөрүүд, олон улсын байгууллагуудын үйл ажиллагаа, авч хэрэгжүүлж буй арга хэмжээнүүд, хүрэх үр дүнгийн талаар санал солилцох, хоорондын уялдаа холбоог хангах талаар ярилцлаа.
Уур амьсгалын өөрчлөлт, цөлжилт, газрын доройтол нь улс орнуудын эдийн засаг, хүн амын эрүүл мэнд, байгаль орчинд ноцтой аюул үзүүлэх болж, хөрс, агаар, усны чанарт сөргөөр нөлөөлж, тогтвортой хөгжлийн зорилтуудыг хэрэгжүүлэхэд ихээхэн бэрхшээл учруулж байгааг оролцогч талууд онцоллоо. Монгол Улсын Засгийн газар нь Парисын хэлэлцээрээр хүлээсэн үүргээ хэрэгжүүлэх үйл ажиллагааны хүрээнд Үндэсний тодорхойлсон хувь нэмрийг холбогдох салбаруудад хэрэгжүүлэх, хүлэмжийн хийн ялгарлыг 2030 онд гэхэд 2010 оны суурь түвшнээс 22.7 хувиар бууруулах, уур амьсгалын өөрчлөлтийн нөлөөнд эмзэг, өртөмтгий эдийн засгийн голлох салбаруудын дасан зохицох төлөвлөгөөг боловсруулж, чадавхыг бэхжүүлэх чиглэлээр идэвхитэй ажиллаж байгаа бөгөөд БОУАӨ-ийн Сайдын 2024 оны 11 дүгээр сарын 22-ны өдрийн А/807 тоот тушаалаар Монгол Улс Парисын хэлэлцээрээр хүлээсэн үүргээ хэрэгжүүлэх ҮТХН-ийн зорилтуудыг ахиулан шинэчлэх үүрэг бүхий ажлын хэсгүүд байгуулагдаж, тус баримт бичгийг 2025 оны 06 дугаар сард Засгийн газраар хэлэлцүүлэн, батлуулахаар төлөвлөн ажиллаж байгаа аж. Үүнтэй холбоотойгоор, тус зөвлөлдөх уулзалт нь одоо хэрэгжиж буй төсөл хөтөлбөрүүдийн хамтын ажиллагааны чиглэл, хэлбэрийг улам боловсронгуй болгох, уур амьсгалын өөрчлөлт, цөлжилт, газрын доройтол, биологийн олон янз байдлыг хамгаалах чиглэлийн санаачилгуудын хоорондын уялдаа холбоог бэхжүүлэх, хамтын ажиллагааны суурийг бий болгоход чиглэгдэж байна.
