Хоршоодыг чадавхжуулах төслийн гишүүд уулзаж, үйл ажиллагааны давхардлыг арилгах, хамтран ажиллах боломжийн талаар санал солилцов

“Тана Лаб” ХХК, “Аймаг, сумын бүсчилсэн ногоон хөгжлийн хөрөнгө оруулалтын хөтөлбөр” төсөл болон “Цахим хоршоо” төслийн багийнхан Шинэ хоршоо хөдөлгөөний салбар дундын уялдааг хангах Үндэсний хорооны ажлын албаны төлөөлөлтэй уулзлаа.

Уулзалтад:

🔹Б.Ванчиндорж – “Аймаг, сумын бүсчилсэн ногоон хөгжлийн хөрөнгө оруулалтын хөтөлбөр” төслийн дэд зохицуулагч
🔹Д.Одончимэд – “Тана Лаб” ХХК-ийн захирал
🔹Л.Баяртулга – “Цахим хоршоо” төслийн зохицуулагч тэргүүтэй төлөөлөл оролцов.

Б.Ванчиндорж төслийн хөрөнгө оруулалтын чиглэлээр бэлчээрийн даац, микро төслүүдийг дэмжих, бэлчээрийн ашиглалтыг сайжруулах, хоршоодын үйл ажиллагааг өргөжүүлэх арга хэмжээг танилцуулсан бол Д.Одончимэд Японы дундын хоршооны загварыг судалсан туршлага, Л.Баяртулга “Цахим хоршоо” төслийн хүрээнд хэрэгжүүлэх цахим платформыг танилцууллаа.

Уулзалтын төгсгөлд гурван байгууллагын төлөөлөл төслийн хүрээнд хэрэгжих үйл ажиллагааны уялдаа холбоог сайжруулах, давхардлыг арилгаж хамтран ажиллахаар тохиролцсон бөгөөд дундын хоршооны жишиг загварчлалын төлөвлөгөөг боловсруулахаар боллоо.